Epopetë kushtuar liderëve nuk janë lajme
Published in Recensione
on 8 - 03 - 2016 Author: Agron Vrangalla[Recension: “Politikani i hekurt, Menduh Thaçi sot mbush 51 vjeç”]
Jo rastësisht, gjatë faqosjes së gazetave është menduar që tekstet në gazetë të ndahen në kategori, apo rubrika. Krahas kësaj, ndarja e teksteve në zhanre mediatike është e një rëndësie të veçantë për etikën e këtij profesioni. Me realizimin e këtyre kategorizimeve, ju arrini që t’i sqaroni publikut se për çfarë teksti apo përmbajtje bëhet fjalë. A bëhet fjalë për lajm, për koment, opinion, reportazh, kronikë të zezë, njoftim, hapësirë reklamuese, e kështu me radhë. Apo, duke bërë ndarjen e rubrikave, ju arrini që publikut t’i ofroni lajme nga fusha e politikës, ekonomisë, sociales, kulturës, argëtimit e tjerë. Gjithashtu edhe mediat online, të njohura ndryshe si portale, kanë trashëguar këtë rregull gazetaresk me qëllim të ruajtjes së ndershmërisë dhe transparencës ndaj publikut. Tani shtrohet pyetja: Çfarë ndodh nëse një material të caktuar, që nuk ka lidhje me atë që definohet si lajm, e vendosim në rubrikën e lajmeve dhe si të tillë tentojmë t’ia shesim publikut, sikur të ishte një lajm i zakonshëm si gjithë të tjerët? Duhet theksuar se publiku është shumë i zgjuar. Mund ta mashtroni ndoshta njëherë-dyherë, por jo gjithmonë. Në një moment të caktuar, do të vëreni se niveli i lexueshmërisë apo numri i klikimeve për përmbajtje të tilla ka filluar të shënojë rënie.
Linku për te artikulli origjinal: Politikani i hekurt, Menduh Thaçi sot mbush 51 vjeç
Data dhe koha e publikimit: 03.03.2016, ora 12:24
Data e recensionit: 07.03.2016
Recensues: Agron Vrangalla
Nëse orvatemi të identifikojmë tekstin që është marrë në analizë, mund të thuhet se bëhet fjalë për një lloj ‘mini-monografie’ kushtuar liderit të PDSH-së, Menduh Thaçit. A ka diçka që nuk shkon këtu? Po, sepse përmbajtja është botuar në kategorinë e lajmeve. Arsyeja e redaksisë për të botuar këtë tekst është ditëlindja e Thaçit (3 marsi), gjë që është shumë diskutabile nga aspekti profesional. Me këtë rast, në pika të shkurtra, aty përmenden disa momente nga biografia e tij politike. E gjithë kjo bëhet në formën e një “epopeje”, ku lideri i PDSH-së përshkruhet si një njëri shumë i suksesshëm dhe pa gabime në fushën politike. Po të merrej dhe të analizohej figura e tij në një dimension më gjithpërfshirës, atëherë sigurisht se mund të dilte një lloj analize shumë e mirë e kushtuar këtij personazhi politik. Mirëpo, të mos harrojmë, përsëri nuk do të justifikohej që e njëjta të botohej në rubrikën e lajmeve.
Aty, ndër rreshta, përmenden edhe meritat që ka i pasur Menduh Thaçi sipas autorit në punësimin e shqiptarëve në një kohë kur kjo gjë ka qenë shumë e vështirë. Por, përshkrimi e lartëson Thaçin në përmasat e një “mbinjeriu”, duke thënë se: “Të punësuarit shqiptarë që u kyqën në institucione para 15 viteve, edhe sot e kësaj dite mund të vërehen nga një pjesë e madhe e qyteteve si Tetova dhe Gostivari dhe vende të tjera të cilët që në orën 8 të mëngjesit udhëtojnë në drejtim të Shkupit duke i bllokuar të gjitha rrugët.” Fraza të tilla ndonjëherë të fusin frikën, me vetë tentimin për të të shtyrë të mendosh se po të mos ishte Menduh Thaçi, sikur pretendon autori i këtij teksti, shqiptarët e qyteteve të tjera brenda vendit, edhe sot e kësaj dite nuk do ta shihnin me sy Shkupin dhe se falë tij, ata panë dritën e punësimit nëpër institucione të ndryshme. Këtë vlerësim secili mund ta perceptojë në mënyrë të ndryshme, të çuditshme sigurisht, por më e ëmbla që mund të thuhet në këtë rast është: Vallë e keni seriozisht ?!
Në kodin e etikës së gazetarëve të Maqedonisë thuhet:
Çdo lloj publikimi komercial, si dhe propagandë politike që nuk janë të veçuara saktë vlerësohen si shkelje e rëndë e standardeve profesionale
Ndërkaq, qershia mbi tortë, është vetë urimi për ditëlindjen kushtuar liderit të PDSH-së. Dhe kujdes, urimin nuk e bën gazetari në emrin e tij personal, por në emër të të gjithë stafit të agjencisë së lajmeve që ka botuar këtë tekst. Nuk e di për ju, por mua gjëja e vetme që më kujtohet në këto momente është zëri karakteristik i Frank Sinatra-s dhe kënga “Happy birthday to you”.
Po lajmi ku ngeli? Po misioni i gazetarisë ku humbi?
INFOGRAPHIC
TRUTHFULNESS
ka fakte
nuk mund të përcaktohet saktësia e pohimeve
:
SOURCES OF INFORMATION
nuk ka burime të evidentuara
nuk mund të përcaktohet
EXTENSIVENESS
jogjithëpërfshirës
ndoshta ka informata të fshehura
BIAS
nuk mund të përcaktohet
ka shtrembërim të së vërtetës (spin)
nuk mund të përcaktohet
është i njëanshëm
anshmëri politike
COMMENTING
ka elemente të komentimit
të integruara me faktet
PLAGIARISM
nuk mund të përcaktohet
TITLE QUALITY
Lavdëron në mënyrë jokritike
jokreativ
senzacionalist
adekuat
tendencioz
PHOTOGRAPH
ka
adekuate
as manipulon as informon - është vënë vetëm si ilustrim
nuk është theksuar autori (burimi)
HATE SPEECH
nuk ka gjuhë ofenduese
nuk ka gjuhë të urrejtjes
nuk nxit për përdorimin e dhunës
nuk diskriminon
EDITED FOR THE WEB
i lexueshëm
nuk aplikohet
nuk ka linke kontekstuale
i rregulluar në aspekt stilistik
i palidhur me tag-e