[Recension: “Rafiz Aliti, kundërshton marrëveshjen e garantuar nga SHBA, BE, Viktoria Nuland, Hoyt Yee, Johanes Han? “Msus, koha është për pensionim””]

Fjala e lirë është një nga të drejtat e garantuara me ligjet e vendit dhe me konventat ndërkombëtare. Në bazë të saj funksionon gazetaria e pavarur dhe pikërisht këtë vlerë duhet të promovojnë gjithmonë gazetarët. Ai duhet të informojë për qëndrimet e të gjitha palëve të përfshira në storje, por jo të sulmojë në forma amatoreske, gjoja me qësëndisje dhe aspak serioze, subjektet për të cilët shkruan e që mendojnë ndryshe.

Linku deri te artikulli origjinal: “Rafiz Aliti, kundërshton marrëveshjen e garantuar nga SHBA, BE, Viktoria Nuland, Hoyt Yee, Johanes Han? “Msus, koha është për pensionim””

Data dhe koha e publikimit: 24.07.2016, 11:19

Data e recensionit: 26.07.2016

Recensues: Fatlume Dervishi

Në përmbajtje është drejtuar sulm ndaj deputetit të BDI-së Rafiz Aliti, për shkak të kundërshtimit të tij ndaj marrëveshjes së arritur mes katër partive politike dhe ndërkombëtarëve.

… deputeti Aliti kundërshtoi ashpër reformat në kodin zgjedhor të cilat reforma mbështeten fuqishëm nga ambasadori amerikan në Shkupi Bejli dhe nga përfaqësuesit e BE-së.

Kjo paraqitje e Alitit më së tepërmi paraqitet si “marketing politik”, për shkak se në komunën e Sarajit ai gëzon autoritet tepër të ulët tek votuesit shqiptarë. Andaj këtë marveshje Aliti tenton që të merr pika politike, para popullatës shqiptare për t’u prezantuar si “hero”. 

Teksti nuk është marrë fare me faktin se pse kjo marrëveshje është kontestuese për Alitin, nuk ka sqaruar pikat që atij i duken problematike dhe pse i duken problematike, nuk ka treguar se pse sipas Alitit kjo nuk është një marrëveshje e qëlluar. Me një fjalë, duket sikur me këtë përmbajtje i jepet porosi Alitit, se përderisa janë në mes faktori ndërkombëtar, ai s’ka të drejtë aspak të flasë. Për më tepër, kjo bëhet me një titull odenfues që i sugjeron “pensionimin”.

Ky “rebelim” i deputetit Aliti është i pabazë për shkak se marveshja e fundit politike në Shkup për dalje nga kriza e kanë mbështetur fuqishëm Brukseli dhe Uashingtoni zyrtarë, andaj askush nuk mund të kontestojë.

Këtë tentativë të Alitit për të kundërshtuar marrëveshjen, vetë autori, pa pasur të drejtë profesionale, e ka cilësuar si marketing politik për të fituar mbështetjen e elektoratit në komunën nga ai vjen. Përveç këtij komenti, autori ka dhënë edhe komente të tipit “rrebelim”, “tenton të prezantohet si hero”, “askush nuk mund ta komentojë” dhe të tjera. Me një fjalë, autori ka shfrytëzuar çdo “armë” (fjalë sulmuese, akuza) për të treguar se Aliti nuk ka të drejtë, por nuk e ka bërë këtë duke shfrytëzuar fakte, analiza mbi marrëveshjen dhe persona që do të dëshmonin atë që pretendohet në përmbajtje, se marrëveshja nuk lë vend për kundërshtime.

Që pasqyra të ishte më e qartë, vetë Aliti mund të sqaronte për këtë medie se pse e vlerëson marrëveshjen si të dëmshme për shqiptarët, si mund ta dëmtojnë ndryshimet në Kodin Zgjedhor elektoratin shqiptar, si dhe cila është zgjidhja e mundshme sipas Alitit.

Kodi etik i gazetarëve të Maqedonisë:

• Gazetari duhet të sigurojë “palën e dytë”, respektivisht t’u jep mundësi të dy palëve të interesuara të produktit gazetaresk ta shprehin qëndrimin e tyre. Kjo edhe më tepër vie në shprehje kur gazetari shpreh dyshime ose akuza ose kur dikush është objekt i sulmit apo kritikës.

• Ato që kanë qenë objekt i sulmit apo kritikës duhet të kenë mundësi të përgjigjen para se kontributi të publikohet, dhe nëse kjo nuk ndodhë dhe përgjigja vjenë pas publikimit, ai duhet të jenë në masë të arsyeshme, i lidhur me temën dhe në formë korekte.

Për të balancuar qëndrimet, autori ka mundur të shfrytëzojë edhe një njohës të rrethanave, i cili do të analizonte marrëveshjen nga njëra anë dhe qëndrimet e Alitit nga ana tjetër, për të qartësuar situatën para opinionit. Në fund, konkluzionet për vlerësimin e qëndrimit të Alitit, lexuesi do të kishte hapësirë t’i bënte vetë, nëse ka ose jo të drejtë që mban një qëndrim të tillë.

Fakti që ndërkombëtarët qëndrojnë pas zhvillimeve të caktuara, nuk do të thotë se media duhet të sulet dhe të shtypë çdo mendim  që nuk përputhet me të tyrin.