Propaganda politike – fund i seriozitetit të një mediumi
Published in Recensione
on 19 - 10 - 2016 Author: Agron Vrangalla[Recension: “Paraqitja e Afrimit të BESËS e trishton Grubin – po i vjen fundi BDI-së”]
Instrumenti më i fuqishëm i propagandës politike ngelet masmedia. Jo se ky është qëllimi i mediave, por sepse kështu ndodh nëse mediat shfrytëzohen për qëllime politike. Mirëpo, ka një gjë që është shumë e rëndësishme të theksohet. Që të ketë një propagandë politike efektin e duhur, nuk mjafton vetëm një medium. Mezazhi zakonisht përcillet përmes më tepër mediave, sepse kur publiku dëgjon një informacion që përsëritet nga më shumë media, atëherë ai fillon të mendojë seriozisht për të. Pra, propaganda politike realizohet nëpërmjet një zinxhiri mediatik. Dhe, kjo nuk është një gjë e mirë.
Linku për te artikulli origjinal: Paraqitja e Afrimit të BESËS e trishton Grubin – po i vjen fundi BDI-së
Data dhe koha e publikimit: 12.10.2016
Data e recensionit: 14.10.2016
Recensues: Agron Vrangalla
Këtu kemi një tekst absolutisht të njëanshëm. Ekzistojnë shumë media që janë thellë të bindura se me kontributin e tyre do të mund të ndikojnë për t’i mbushur mendjen elektoratit që të votojnë për atë parti politike, të cilën e mbështesin këto media. Ka nga ato që e quajnë edhe detyrim kombëtar për të mbështetur një forcë politike. Apo edhe mision jetësor. Gjithçka është e mundur në një numër të madh të mediave tona. Vetëm një gjë nuk po bëhet e mundur: të kuptojnë se cili është roli i tyre dhe të punojnë në kuadër të këtij roli. Janë bërë zëdhënës partie, avokatë të politikanëve, truproje të tyre e kështu me radhë. Është pothuajse ekspeditë e dështuar nëse nisesh të kërkosh një medium me standarde profesionale.
Teksti niset kryekëput nga disa qëndrime të një partie politike. Tregon në fillim se cili është prioriteti i kësaj partie dhe del se prioriteti më i madh i Lëvizjes Besa është rrëzimi i BDI-së. Çudi e madhe. Pse ato partitë e tjera çfarë prioriteti kanë, apo të luten natë e ditë që përsëri të fitojë BDI-ja dhe ato të humbin?! Për pushtet që jep mundësinë e realizimit të përcaktimeve programore dhe ideologjike luftojnë të gjithë, se për çfarë tjetër?
Sidoqoftë, kjo ka të bëjë me rëndësinë që i kushtohet një deklarate që nuk thotë asgjë. Pastaj, përmbajtja vazhdon me citimin e një përfaqësuesi të të njëjtës parti, i cili është i ftuar në një televizion që është akuzuar disa herë se mbron politikat e kësaj partie, edhe pse fakte për këtë nuk ka, përpos disa nuancave të prioriteteve të politikës redaktuese të televizionit që mund të interpretohet se aludojnë në mbështetjen përnjëmend të kësaj partie. Dhe, sipas tekstit, këto deklarata në këtë emision kanë ngjallur panik tek anëtarët e BDI-së.
Por, autori përdor një term tjetër, duke i quajtur anëtarët – “artanët e saj”. Këtë term e mbështet në një status që ka bërë Artan Grubi lidhur me qëndrimet e shpalosura të anëtarit të apostrofuar të kryesisë së Lëvizjes Besa. Në vend që të mjaftohet me përfshirjen e palës së kundërt duke cituar këtë qëndrim, autori përdor një term jo të hijshëm, sepse fundja, janë ca njerëz që kanë votuar për atë parti. Ky është edhe një element më shumë ku shfaqet averzioni ndaj BDI-së, gjë që është e ndaluar të përfshihet në tekstin e një lajmi. Pse, mediat që kanë një lloj kredibiliteti, mendoni se janë dakort me të gjitha qëndrimet e partive politike? Absolutisht jo, por çfarë të bëjnë… Kanë vendosur të jenë media profesionale, e jo shtabe virtuale të partive politike. Dhe, kur je media, do të sillesh siç e kërkon detyra e gazetarisë. Publiku më pas vlerëson se kush është “i miri” apo “i keqi”.
Që anshmëria të kapë kulmin, teksti përmbyllet me një fjali komplet propagandistike, që flet për organet e strukturuara mirë të kësaj partie dhe numrit të madh të qytetarëve që u mblodhën në protestën e Lëvizjes Besa, duke e cilësuar si protestën më të madhe shqiptare në vend. Të gjithë këto cilësime mund të jenë në favor të kësaj partie politike, por asesi në favor të këtij portali. Përkundrazi, kjo mund të cilësohet si një vetëflijim i portalit, përkatësisht profesionalizmit të tij, vetëm e vetëm për t’i qëndruar besnik deri në fund “kauzës” të cilën e mbron ai. Gjë tërësisht e gabuar, sepse kauza e një mediumi është interesi publik, e jo interesi partiak.
INFOGRAPHIC
TRUTHFULNESS
ka fakte
pohime të sakta
deklarata të vërteta
SOURCES OF INFORMATION
ka burime të evidentuara
2 burime
një palë
EXTENSIVENESS
jogjithëpërfshirës
informata të fshehura
BIAS
pjesërisht e paraqet të vërtetën
ka shtrembërim të së vërtetës (spin)
nuk ka informata të rrejshme
mban anën e një pale
anshmëri politike
COMMENTING
ka elemente të komentimit
të integruara me faktet
PLAGIARISM
vepër origjinale
TITLE QUALITY
informon
jokreativ
senzacionalist
joadekuat
tendencioz
PHOTOGRAPH
ka
adekuate
as manipulon as informon - është vënë vetëm si ilustrim
nuk është theksuar autori (burimi)
HATE SPEECH
gjuhë ofenduese
nuk ka gjuhë të urrejtjes
nuk nxit për përdorimin e dhunës
diskriminon
diskriminim politik
EDITED FOR THE WEB
i lexueshëm
nuk aplikohet
ka linke kontekstuale
i rregulluar në aspekt stilistik
i palidhur me tag-e